Aranès - Català - Español - English - Français 

Auetz ath deuant un des paragrafs dera poesia titolada Cançon dera Garona de Mossen Jusèp Condò Sambeat. Aguesta òbra, deth caperan e escrivan aranés, siguec premiada damb era medalha de bronze des Jòcs Floraus dera Escòla des Pirenèus en Bolònha en 1913 e ei contenguda ena novèla Era Isla des Diamants que remasse tota era sua produccion literària.

“Eth parlar que jo vos dèishi
Com ua pèrla sauvatz-lo,
Com un bèth jardin sauclatz-lo.
Non cambietz!
Tostemp gascons!”

Eth collectiu Lengua Viua, creat en an 1992 entà possar er usatge sociau der aranés, a escuelhut aguesta frasa pera sua clara demana de conservacion deth nòste mès volut tresaur qu’ei era lengua aranesa. La placèrem enes cubèrts der Ajuntament de Vielha eth 19 d’octobre de 2019 damb motiu deth centenari dera mòrt deth poèta.

Er objectiu deth collectiu non ère sonque eth de balhar aumenatge ath nòste mès insigne escrivan, senon tanben hèr vedible eth sòn prec de proteccion dera lengua, que hèm nòste tanben. Volem atau desvelhar as aranesi eth besonh dera estima e proteccion dera lengua, ath temps que la manifestam a toti es que mos visiten.

Er acte de descubèrta d’aguest pannèu compdèc damb representants deth pròpri collectiu Lengua Viua seccion dera Fondacion Privada deth Musèu Etnologic dera Val d’Aran e der Ajuntament de Vielha que ne cedic er espaci, talament coma podetz veir en aguestes fotografies que Miguel Fernández hec tath collectiu.

Lengua Viua volec compdar, en acte, damb era preséncia de Mossen Jusèp Amiell, que siguec archiprèste d’Aran pendent 23 ans, prèmi Lengua Viua en 1991, e qu’ei bon coneishedor dera figura e òbra d’aguest escrivan.
Podetz arténher mès informacion sus Mossen Condó Sambeat ena òbra Era Isla des Diamants dera Bibliotèca dera Escòla des Pirenèus publicada en 1981 e tanben ena òbra deth madeish títol ena sua version normalizada peth Conselh Generau d’Aran en 2006.

Entà auer mès informacion sus eth collectiu Lengua Viua, vos podetz adreçar tath Facebook deth collectiu o ena web dera Fondacion: fondacion.org.

Lengua Viua placèc ua escultura deth dessenhaire de mair aranesa André Ricard, autor entre ues autes òbres dera tèda olimpica de Barcelona en 1992, ath deuant dera sedença deth Govèrn d’Aran en 2008. Atau tanben cada an amie endeuant era Corsa Aran per sa Lengua que remasse lèu un milèr de persones eth darrèr dimenge de junhsèga.