Lengua Viua seccion dera Fondacion Privada deth Musèu Etnologic dera Val d’Aran, se creèc hè 15 ans entara posa der usatge sociau der aranés, entad aguest fin a realizat, cada an des d’alavetz, era corsa “Aran per sa lengua” e desparières activitats: representacions teatraus, lectura de tèxtes literaris e era quilha d’ua escultura de 6 m. de nautada en aumenatge ara lengua e cultura araneses.
CORSA ARAN PER SA LENGUA
Aguesta corsa se desvolope des de: Les, Montgarri/Tredòs e eth Pòrt de Vielha, en tot caminar e en tot córrer, entà arribar ena plaça dera Glèisa de Vielha a on s’i amassen, de costum, un miler de participaires.Un còp arribadi e hèt eth parlament deth collectiu, tostemp reivindicatiu der usatge sociau der aranés, s’autrege eth prèmi Lengua Viua creat entà guardonar a persones, collectius o institucions que s’agen caracterizat pera sua lengua pròpria d’Aran. Er acte acabe tamb un concèrt de musica occitana.
Enguan era Fondacion Privada deth Musèu s’a hijut ath hestejament deth 15au.
aniversari dera corsa en tot realizar ua exposicion a on s’i contenguie mès d’un centeat de fotografies dera corsa e tot un seguit de materiau diuèrs comercializat peth collectiu ath long d’aguesti ans.
SERADES TEATRAUS
Eth collectiu Lengua Viua a hèt desparières serades ath long des ans entà promòir er usatge dera lengua. S’an revirat ar aranés òbres classiques coma: Era forena adondada, de W. Shakespeare, d’autes d’autors actuaus coma : T’estimi es perfècte, ja te cambiarè de J. Dipietro e d’autes d’autors aranesi/occitans coma: Mau de television de Pepita Caubet, etc.LECTURA DE TÈXTES
Pendent eth dia de St. Jòrdi, 23 d’abriu, eth collectiu tanben se hig ath hestejament deth dia deth libre, en tot organizar lectures publiques de tèxtes literaris en aranés.ESCULTURA/MONUMENT
En complir eth sòn 10 au. Aniversari, eth collectiu Lengua Viua prepausèc eth bastiment d’ua escultura/monument ara lengua e cultura araneses, que siguec dessenhada per André Ricard originari dera Val d’Aran e autor, entre d’autes causes, dera halha olimpica Barcelona’92.Enguan aguest projècte s’a hèt realitat tamb un còst de mès de 134.000 €.
Era escultura qu’a 6 m. de nautada e 24 tones de pes ei hèta en pèira de barrina, procedenta dera pèirera de Les, proprietat deth Sr. Jaume Llauradó que ne cedic eth materiau. I an collaborat tanben tamb es màgers aportacions economiques: eth Conselh Generau d’Aran, en tot auançar era òbra dera plaça deuant dera sua sedença, a on s’a plaçat eth monument e en tot assumir ath delà eth còst dera basa deth madeish, era Fondacion Endesa qu’a financiat er enlumenatge, era Diputacion de Lleida entre d’auti, etc.
