resentacion dera revista Tèrra Aranesa num. 17 e deth libre Ramon Carità Cau compilat pera Sra. Dolores Beso
Conferéncia sus eth hons documentau dera Centrau de Cledes de Les a cargue dera Sra. Mª Pau Gómez
Eth dissabte 12 de seteme de 2020, auec lòc entàs 19:00 ores en Santuari de Santa Maria de Mijaran, er acte de presentacion dera revista Tèrra Aranesa num. 17 e deth libre Ramon Carità Cau compilat pera Sra. Dolores Beso.
En madeish acte tanben s’impartic era conferéncia sus er hons documentau dera Centrau de Cledes de Les a cargue dera Sra. Mª Pau Gómez.
Era revista Tèrra Aranesa num. 17, compde damb un totau de dètz articles, a on es lectors i poderàn conéisher era vida vidanta de Teresa Estampa e Francesc Bugat de Bausen, parelha qu’ath sòn entorn a sorgit ua legenda, mès tamb aguesta documentacion estudiada peth Doctor Joan Carles Riera Socasau, poderàn veir perqué siguec enterrada en un cementèri privat. Era sra. Mª Pau Gómez directora der Archiu Generau d’Aran, explique eth hons documentau dera Centrau de Cledes de Les, en tot partir de 1901 quan se crompe era finca entà dar inici ath projècte d’aprofitament des aigües deth Garona. Eth sr. Àngel Claveria mos amie tanben as ans 1908 e enquia 1932, temps que foncionèc era Estacion Meteorologica ena vila de Vielha. Se transcriu era conferéncia amiada a tèrme en abriu de 2019 peth sr. Andrèu Pujol, eth sr. Juli Sala e era sra. Lourdes Santacruz, sus es 100 ans d’esquí ena Val d’Aran. Era sra. Elisa Ros hè un estudi istoricoarqueologic deth santuari de Santa Maria de Mijaran, rèstes qu’an suberviscut a un pialèr d’eveniments de grana importància entara istòria d’Aran. Era sra. Lourdes Santacruz explique es inicis deth montanhisme, ara tant de mòda, mès sustot de toti aqueri que deishèren peada en tot passar per Aran. Eth sr. Feliu Izard a hèt arribar un article, sustot grafic, dera inauguracion deth Servici Telefonic de Hòs a Sort, deseme de 1925. Atau tanben se pòden veir imatges des escòles d’Aran. Eth sr. Alvaro Aunòs e era sra. Gemma Arjò dan a conéisher coma s’a desvolopat era malautia deth vesc enes nòsti bòsqui. E entà acabar, Mn. Amiell conde ua istorieta sus Sant Benet Labre e eth pòble d’Es Bòrdes.
Damb era lectura d’aguesti articles se pòt hèr un passeg peth passat, a on era nòsta istòria quede refectida entà tostemp, tàs generacions que vien ath darrèr e tàs estudiosi dera nòsta Tèrra.
Fotos Colleccion FMEVA
