Eth passat 21 de deseme de 2016, era Fondacion Privada Musèu Etnologic dera Val d'Aran recuelhec eth IVau Prèmi Robèrt Lafont autrejat pera Generalitat de Catalonha a mans deth Conselhèr de Cultura Santi Vila.
Aguest acte auec lòc ena sedença dera Societat General d'Autors i Editors (SGAE) de Barcelona. Aguesta ei era IVaua edicion deth prèmi e ei eth prumèr còp que s'autrege a ua entitat.
Atau madeish, aguest acte compdèc damb es intervencions dera directora generau de Politica Lingüistica, Ester Franquesa, eth president de Convergéncia Occitana, Joan Francèsc Laffont, era professora de dret dera Universitat de Barcelona especialista en dret lingüistic Eva Pons e eth professor de linguistica Occitana dera Universitat de Tolosa-Joan Jaurès, Patric Sauzet.
Aguest prèmi recep eth nòm deth lingüista, istoriador, novelista e activista occitan Robèrt Lafont e s'intaurèc en an 2010 per part dera Generalitat de Catalonha. Eth prèmi Robèrt Lafont s'inscriu en marc de reconeishença dera lengua occitana coma oficiau en Catalunya e a coma objectiu reconéisher e premiar as persones o entitats que luten pera defensa, projeccion e promocion dera lengua occitana.
Era Fondacion Privada Musèu Etnologic dera Val d'Aran se creèc en an 1973 damb er objectiu de promòir e deféner era cultura e lengua aranesa. D'entre es sues activitats cau destacar: era participacion ena creacion deth Musèu dera Val d'Aran, er impuls des prumèrs concorsi literaris en aranés, era publicacion annau dera revista Tèrra Aranesa, es exposicions itinerantes que mos mòstren es costums e tradicions d'Aran, publicacions de libres, entre d'autes.
Er acte compdèc tamb es actuacions musicaus de "Las Mondinas", grop polifonic gascon de Tolosa e Alidé Sans, cantautora aranesa.
Eth Conselhèr de Cultura sr. Santi Vila liure eth prèmi ara presidenta dera Fondacion Privada Musèu Etnologic dera Val d'Aran, Ròsa Maria Salgueiro. Eth prèmi ei un bust òbra der escultor Manel Cusach.
Ares Riu, presentadora der informatiu diari en aranés en canau 3/24 de TV3, presentèc er acte de liurament deth IVau Prèmi Robèrt Lafont.
